ਜਲੰਧਰ : ਉੱਪਲ ਫਾਰਮ ਵੀਡੀਓ ਮਾਮਲੇ ‘ਚ ਅਚਾਨਕ ਵੱਡਾ ਮੋੜ ਸਾਹਮਣੇ ਆਇਆ ਹੈ। 19 ਸਾਲਾ ਕੁੜੀ ਵੱਲੋਂ ਆਪਣੇ ਮੰਗੇਤਰ ਅਤੇ ਉਸ ਦੇ ਦੋਸਤ ਖ਼ਿਲਾਫ਼ ਸਰੀਰਕ ਸ਼ੋਸ਼ਣ ਕਰਨ ਤੇ ਵੀਡੀਓ ਲੀਕ ਕਰਨ ਦੇ ਦੋਸ਼ ਲਗਾਏ ਗਏ ਸਨ। ਸ਼ੁਰੂਆਤੀ ਦੌਰ ਵਿੱਚ ਇਹ ਮਾਮਲਾ ਬਹੁਤ ਗੰਭੀਰ ਰੂਪ ਧਾਰਨ ਕਰ ਗਿਆ ਸੀ ਅਤੇ ਪੁਲਿਸ ਨੇ ਦੋਵਾਂ ਨੌਜਵਾਨਾਂ ਖ਼ਿਲਾਫ਼ ਐਫਆਈਆਰ ਵੀ ਦਰਜ ਕਰ ਲਈ ਸੀ। ਪਰ ਹੁਣ ਖ਼ਬਰ ਸਾਹਮਣੇ ਆਈ ਹੈ ਕਿ ਦੋਵੇਂ ਪਰਿਵਾਰਾਂ ਨੇ ਆਪਸੀ ਸਹਿਮਤੀ ਨਾਲ ਇਹ ਵਿਵਾਦ ਨਿਪਟਾ ਲਿਆ ਹੈ। ਦੋਵਾਂ ਧਿਰਾਂ ਵੱਲੋਂ ਸਾਫ਼ ਕੀਤਾ ਗਿਆ ਹੈ ਕਿ ਇਹ ਸਾਰਾ ਮਾਮਲਾ ਇੱਕ “ਗਲਤ-ਫਹਿਮੀ” ਦੇ ਅਧਾਰ ‘ਤੇ ਤਿਆਰ ਹੋਇਆ ਸੀ, ਜਿਸ ਦਾ ਹੁਣ ਹੱਲ ਕੱਢ ਲਿਆ ਗਿਆ ਹੈ।
ਮੁੰਡੇ ਦੇ ਪਿਤਾ ਨੇ ਦਿੱਤਾ ਬਿਆਨ
ਮੁੰਡੇ ਦੇ ਪਿਤਾ ਅਵਤਾਰ ਸਿੰਘ ਸੰਧੂ ਨੇ ਮੀਡੀਆ ਨਾਲ ਗੱਲਬਾਤ ਦੌਰਾਨ ਕਿਹਾ ਕਿ ਅੱਜ ਦੋਵਾਂ ਪਰਿਵਾਰਾਂ ਨੇ ਬੈਠ ਕੇ ਆਪਸੀ ਗਿਲੇ-ਸ਼ਿਕਵੇ ਦੂਰ ਕਰ ਲਏ ਹਨ। ਉਨ੍ਹਾਂ ਨੇ ਕਿਹਾ –
“ਅਸੀਂ ਆਪਸੀ ਸਮਝੌਤੇ ‘ਤੇ ਪਹੁੰਚ ਗਏ ਹਾਂ। ਜੋ ਵੀ ਗੱਲਾਂ ਸਾਹਮਣੇ ਆਈਆਂ, ਉਹ ਹਕੀਕਤ ‘ਤੇ ਅਧਾਰਿਤ ਨਹੀਂ ਸਨ। ਬਹੁਤ ਕੁਝ ਸੁਣਿਆ-ਸੁਣਾਇਆ ਹੀ ਸੀ। ਜੇ ਮੇਰੇ ਪੁੱਤੋਂ ਕਿਸੇ ਕਿਸਮ ਦੀ ਗਲਤੀ ਹੋਈ ਹੈ ਤਾਂ ਮੈਂ ਖੁਦ ਵੱਲੋਂ ਮੁਆਫ਼ੀ ਮੰਗਦਾ ਹਾਂ।”
ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਮੀਡੀਆ ‘ਚ ਜੋ ਕੁਝ ਚਲ ਰਿਹਾ ਸੀ, ਉਸ ਕਾਰਨ ਦੋਵੇਂ ਪਰਿਵਾਰਾਂ ਵਿੱਚ ਤਣਾਅ ਬਣ ਗਿਆ ਸੀ ਪਰ ਹੁਣ ਗੱਲਬਾਤ ਰਾਹੀਂ ਸਭ ਕੁਝ ਸੁਲਝਾ ਲਿਆ ਗਿਆ ਹੈ।
ਪੀੜਤਾ ਕੁੜੀ ਦਾ ਵੱਡਾ ਬਿਆਨ
ਉਧਰ, ਪੀੜਤਾ ਕੁੜੀ ਨੇ ਵੀ ਇੱਕ ਵੀਡੀਓ ਜਾਰੀ ਕਰਕੇ ਆਪਣਾ ਪੱਖ ਰੱਖਿਆ ਹੈ। ਕੁੜੀ ਨੇ ਕਿਹਾ –
“ਪਿਛਲੇ ਦਿਨਾਂ ਤੋਂ ਸੋਸ਼ਲ ਮੀਡੀਆ ‘ਤੇ ਜੋ ਵੀ ਚਰਚਾ ਚੱਲ ਰਹੀ ਸੀ, ਉਸ ਬਾਰੇ ਜਦੋਂ ਅਸੀਂ ਦੋਵੇਂ ਪਰਿਵਾਰ ਬੈਠੇ ਅਤੇ ਗੱਲਬਾਤ ਕੀਤੀ ਤਾਂ ਸਾਰਾ ਕੁਝ ਇੱਕ ਗਲਤ-ਫਹਿਮੀ ਨਿਕਲਿਆ। ਅਸੀਂ ਆਪਸੀ ਸਮਝੌਤੇ ਨਾਲ ਇਹ ਮਸਲਾ ਹੱਲ ਕਰ ਲਿਆ ਹੈ। ਹੁਣ ਮੈਂ ਕਿਸੇ ਵੀ ਤਰ੍ਹਾਂ ਦੀ ਕਾਨੂੰਨੀ ਕਾਰਵਾਈ ਨਹੀਂ ਕਰਨੀ ਚਾਹੁੰਦੀ।”
ਇਹ ਬਿਆਨ ਆਉਣ ਤੋਂ ਬਾਅਦ ਸਾਫ਼ ਹੋ ਗਿਆ ਹੈ ਕਿ ਕੁੜੀ ਹੁਣ ਇਸ ਮਾਮਲੇ ਨੂੰ ਅੱਗੇ ਨਹੀਂ ਵਧਾਉਣਾ ਚਾਹੁੰਦੀ।
ਮਹਿਲਾ ਕਮਿਸ਼ਨ ਨੇ ਲਿਆ ਸੀ ਸੂ-ਮੋਟੋ ਨੋਟਿਸ
ਯਾਦ ਰਹੇ ਕਿ ਇਸ ਕੇਸ ਨੇ ਸੂਬੇ ਵਿੱਚ ਕਾਫ਼ੀ ਚਰਚਾ ਬਟੋਰੀ ਸੀ। ਬੀਤੇ ਦਿਨ ਪੰਜਾਬ ਰਾਜ ਮਹਿਲਾ ਕਮਿਸ਼ਨ ਨੇ ਵੀ ਇਸ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਸੂ-ਮੋਟੋ ਨੋਟਿਸ ਜਾਰੀ ਕੀਤਾ ਸੀ। ਕਮਿਸ਼ਨ ਦੀ ਚੇਅਰਪਰਸਨ ਨੇ ਇਸ ਘਟਨਾ ਨੂੰ ਬਹੁਤ ਹੀ ਦੁੱਖਦਾਈ ਅਤੇ ਮੰਦਭਾਗੀ ਦੱਸਿਆ ਸੀ। ਕਮਿਸ਼ਨ ਵੱਲੋਂ ਜਲੰਧਰ ਦੇ ਐਸਐਸਪੀ ਨੂੰ ਦੋ ਦਿਨਾਂ ਦੇ ਅੰਦਰ ਜਾਂਚ ਪੂਰੀ ਕਰਕੇ 22 ਅਗਸਤ ਤੱਕ ਰਿਪੋਰਟ ਪੇਸ਼ ਕਰਨ ਦੇ ਹੁਕਮ ਦਿੱਤੇ ਗਏ ਸਨ।
ਲੋਕਾਂ ਵਿੱਚ ਮਿਲੀਆਂ ਵੱਖ-ਵੱਖ ਪ੍ਰਤੀਕਿਰਿਆਵਾਂ
ਇਸ ਕੇਸ ਦੇ ਯੂ-ਟਰਨ ਤੋਂ ਬਾਅਦ ਲੋਕਾਂ ਵਿਚ ਵੱਖ-ਵੱਖ ਪ੍ਰਤੀਕਿਰਿਆਵਾਂ ਸਾਹਮਣੇ ਆ ਰਹੀਆਂ ਹਨ। ਕਈ ਲੋਕ ਕਹਿ ਰਹੇ ਹਨ ਕਿ ਜੇਕਰ ਮਾਮਲਾ ਸੱਚਮੁੱਚ ਗਲਤ-ਫਹਿਮੀ ਸੀ ਤਾਂ ਇਸ ਨੂੰ ਸ਼ੁਰੂ ਤੋਂ ਹੀ ਪਰਿਵਾਰਕ ਪੱਧਰ ‘ਤੇ ਹੱਲ ਕਰ ਲਿਆ ਜਾਣਾ ਚਾਹੀਦਾ ਸੀ। ਦੂਜੇ ਪਾਸੇ ਕੁਝ ਲੋਕ ਇਹ ਵੀ ਸਵਾਲ ਖੜੇ ਕਰ ਰਹੇ ਹਨ ਕਿ ਕੀ ਦਬਾਅ ਕਾਰਨ ਕੁੜੀ ਨੇ ਆਪਣਾ ਪੱਖ ਬਦਲਿਆ ਹੈ?
ਜਦੋਂਕਿ ਪਰਿਵਾਰਾਂ ਵੱਲੋਂ ਸਾਫ਼ ਕਿਹਾ ਗਿਆ ਹੈ ਕਿ ਇਹ ਸਿਰਫ਼ ਇਕ ਗਲਤ ਸਮਝ ਸੀ, ਜਿਸ ਦਾ ਹੁਣ ਪੂਰਨ ਤੌਰ ‘ਤੇ ਹੱਲ ਕਰ ਲਿਆ ਗਿਆ ਹੈ।
